Joan den apirilean, Euskal Herriko hainbat txokotatik joandako 50 bat mintzalagun Etxalarko Mokorreko Borda baserrian elkartu ziren. Egindako bi topaketen helburua, herri desberdinetako mintzalagunak harremanetan jartzea izan zen, gainontzekoen errealitatea ezagutu eta lagun berriak egiteaz gain, euskaraz gozatzeko aukera izanik. Horretarako, hainbat ekintza egin zituzten, hala nola ibilaldiak, sukaldaritza eta masaje tailerrak, herriko etxeen historia ezagutu, kantugintza eta abar.

Mintzalagunek eta Mokorreko Borda baserriko kideek oso balorazio positiboak egin zituzten, primeran pasatzeaz gain oso esperientzia aberasgarria izan zutelako. Batek baino gehiagok esaten zuen errepikatzeko moduko plana zela… eta hementxe daukagu aukera!

Etxalarko Mokorreko Borda baserriko lagunek 10 eguneko bi egonaldi antolatu dituzte uda honetarako.

• Lehena, uztailaren 18tik 28ra.
• Bigarrena, abuztuaren 22tik irailaren 1era.

Euskaraz aritu eta bizitzeko gogoa daukan edozein izango da ongi etorria barnetegian.  Hamar eguneko egonaldia 375€ baino ez dira, lotarako tokia, otorduak eta ekintzak barne. Zer egin daiteke bertan? Denetarik! Inguruko txokoak ezagutu, tailerrak, euskal kantu eta dantzak, mitologia, sendabelarrak… Udarako planik ez badaukazue, aukera bikaina da hau!

Izena emateko bi modu dituzue:

• Jarri zuzenean antolatzaileekin harremanetan (etxalarkobarnetegia@gmail.com / 618.303.582 telefono zenbakia (Jone))
• Edo bete lotura honetan aurkituko duzuen galdetegia.

* Informazio gehiago, etxalarkobarnetegia.blogspot.com webgunean edo arrate@topagunea.org helbidean.

Ez genuen alferrik esaten Mintza Eguna mintzalagunen jaia dela. Zer nolako giroa izan genuen larunbatean Elgoibarren! Balorazioak egiteko txanda izaten da oraingoa, baina ezin erakutsi gabe utzi argazki kamerekin betirako izoztu genituen uneak. Egunaren laburpen bat ikusi nahi duzue? Hemen daukazue!

Herriko bertsolari eta dantzari gazteek egin ziguten ongi etorria.

Eguna ondo hasteko, Joxeanek hamaiketakoa jateko baimena eman zigun. Elgoibarko berbalagunek prestatutako tortillak dastatu genituen!

Eta behin tripak beteta, Elgoibarko txokoak ezagutu genituen, tarteka kantuan, Peio Arrietarekin. Eta trikitilariekin, noski!

Nahikoa ikasita, dultzaineroek gidatu gintuzten kalejiran.

Bazkarian ez zen saltsarik falta, irrintzi, kantu, topa… eta janaria ona, ezta?

Sari banaketa hunkigarria izan genuen, barre egin genuen, Bagerako kideek liburu bana eman ziguen opari…

Eta Ziarda eta Narbaiza bertsolariek egunaren laburpena egin zuten.

Azkenik, ezin gorputzak astindu gabe geratu. MP5 erromeriako lagunek berehala berotu zuten eguna!

Eta kontatu ezin ditugunak…

Zoragarria izan zen Elgoibarko Izarrako lagun eta berbalagunek jaia antolatzeko izandako indar, borondate eta ilusioa. Goizean goizetik kartelak jarri, mahaiak prestatu, pegatinak banatu zein hamaiketakorako tortillak egin zituzten. Ez hori bakarrik, egunean zehar zein iluntzean laguntzeko prest egon ziren uneoro. Eta hala ere, erromerian ez zuten dantzarako gogorik galdu! Eskerrik asko, Elgoibarrek izar txiki asko dituela erakutsi diguzue!

Datorren urtean berriz elkartuko gara. Eta bitartean… segi bihotza irekita mingainak dantzan, eta baietz aurkitu zuen burua argazki hauetakoren batean! Barren aldizkariko lagunek ateratako argazkiak dira hauetako asko. On egin!

Mintzalagun, honezkero badakizu Mintza Eguna Elgoibarren izango dela, ezta? Ekainaren 1ean jarri dugu zita, aurreratu genizuen bezala. Bertako berbalagunak eta Elgoibarko Izarra elkarteko kideak buru belarri ari dira lanean, eta egitaraua prest daukate!

EGITARAUA

11.00 Ongi etorria eta hamaiketakoa Maalako Plazan

12.00 Kantu ibilaldi, Pello Arrieta historialariak gidatuta

13:30 Mintza Kalejira, dultzaineroekin

14:30 Bazkaria Maalako Plazan

16.30 Sari banaketa, Ziarda eta Narbaiza bertsolariekin

17:30 Euskal Erromeria MP5 taldearekin

… eta sorpresa gehiago!

Elgoibar ezagutu, mingainak astindu, tripa bete… eta dantza egiten ikasteko aukera ere izango dugu. Bazkarirako txartelak maiatzaren 24ra arte eskuratu daitezke, herriko dinamizatzailearen bidez. 20€ dira, kafea eta kopa barne (eta goizeko hamaiketakoa, noski!). Gogoratu zeliako eta barazkijaleek aldez aurretik eskatu behar duzuela menu berezia. Ez utzi azken unerako!

Giroa berotzen hasteko, iazko argazkiak ikusi nahi? Egin klik hemen!  Euskal Herriko herri desberdinetako mintzalagunak elkartuko gara Elgoibarren, eta jai giro ezin hobea izango dugu!

Ireki bihotza… Elgoibarko mintzalagunentzako!

Gaur goizean Berria Taldeak eta Euskaltzaleen Topaguneak hitzarmena sinatu dugu. Elkarlan horri esker, euskaltzaleen elkarteetako bazkideek eta mintzalagunek egunkariko harpidedun egitean abantaila bereziak  izango dituzte.

Durangoko Topagunearen egoitzan sinatu dute hitzarmena Joanmari Larrarte Berria Taldeko Kontseilari ordezkariak eta Mikel Irizar Euskaltzaleen Topaguneko presidenteak. Helburua, mugimenduaren bueltan dauden lagunei euskaraz bizi ahal izateko tresnak eskaintzea da. Era berean, bazkide zein mintzalagunek euskararen alde egiten duten ahaleginari aitortza xumea egin nahi diogu bi erakundeek, abantaila hau eskaini eta esker ona adieraziz.

Gainera, Berriak, euskararen normalizazioa helburu izanik, egunetik egunera euskaraz bizitzeko hautua egiten duten irakurle berriak hurbiltzeko lanean dihardu sarean zein paperean eskaintzen duen euskarazko informazioaren bitartez.

Euskaraz bizitzeko hautua egiten duten lagunek ezinbestekoa dute hedabideak euskaraz kontsumitu ahal izatea. Zer esanik ez, komunitatean murgildu eta erabilera areagotzeko premia eta nahia duten mintzalagunen kasuan.Tokiko hedabideek aukera ezin hobea ematen dute gure herri edo eskualdeko informazioa jasotzeko, eta haren osagarri naturala da Berriak egiten duen lana, nazio mailako albisteekin.

Horregatik, bazkide eta mintzalagunek harpide eginez gero Berria urtebetez %50eko deskontuarekin jasotzeko aukera izango dute. Hainbat harpidetza mota izango ditugu eskura, ondorengoak hain zuzen:

• Asteartetik-igandera: 222€
• Asteartetik-ostiralera: 141,5€
• Ostirala-larunbata eta igandea: 119,6€
• Larunbata eta igandea: 85,5€

Berrialagun harpidedun egiten direnek, ongi etorri gutunarekin batera berrialagun harpidedun txartela jasoko dute. Txartelaren bidez eta berrialagun harpidedun kodea erabiliz, hainbat abantaila izango dituzte: asteroko kioskoan opariak, kultur emanaldietarako sarreren zozketak, promozioetan eskaintza bereziak eta abar.

Ezin aipatu gabe utzi, Berria egunkariak 10 urte bete dituela aurten. Urteurrena ospatzeko, hainbat kultur emanaldi antolatu dituzte ekainaren 22ra bitartean. Hemen daukazue ekitaldiei buruzko informazioa.

Harpidetzari buruzko informazio gehiago eskuratzeko, idatzi arrate@topagunea.org helbidera edo deitu 673.428.464 / 94.681.48.21 telefono zenbakietara.

Astean behin, auzoko taberna batean sartu eta bost laguneko taldetxoa egoten da bertan. Ez dute hutsik egiten, eta ez dago zalantzarik: berbalagunak dira. Belarria jarri nuen lehen aldian ohartu nintzen.

Freskagarri bat eskatu, eta ondoan esertzen naiz batzuetan. Asteburuari buruz hitz egiten dute, gizarte arazoei buruz, Athletic-i buruz… hitz egitea baita euren helburu nagusia, euskaraz hitz egitea. Estimatzekoa da egiten duten esfortzua, gozagarria daukaten ilusioa, eta azpimarratzekoa denen konpromisoa.

Boskote hori, ordea, ez da kasu isolatu bat. Urte hasierarekin batera, datu bilketa egin dugu Euskaltzaleen Topagunean, eta hara! 5.500 mintzalagun daude Euskal Herri osoan. 5.500 herritar, euskaldunon komunitateko kide aktibo izateko prest. Nork esango zien Donostiako Bagera euskaltzaleen elkarteko kideei, duela 20 urte martxan jarri zuten egitasmo xume hori hainbesteraino hedatuko zenik?

Euskaraz aritzeko ohitura dutenak, ohiturarik ez dutenekin elkartzen ditu mintzapraktika programak. Euskaldunen elkarteen mugimenduak, euskaltegiek eta zenbait udalek apustu sendoa egin zuten duela hainbat urte, eta ordutik etengabe ari dira mintzalagun taldeak bikoizten. Iruñerrian, esaterako, 550 mintzakide batzen dira; eta Gasteizen, beste 640. Erraz esaten ditugu zenbakiak, baina irudikatuz gero, harrigarria irudituko zaio bati baino gehiagori. Ni behintzat harrituta gelditu nintzen Topagunean lanean hasi eta dimentsioa ezagutu nuenean.

Mintzalagunek euskarara hurbiltzeko egiten duten ahalegina goraipatzen dugu askotan, baina zer egin dezakegu freskagarria hartuta inguruan esertzen garen euskaldunok? Erronka handi bat daukagu. Euskaldunon elkarteek, bertako bazkideek zein euskaldun guztiok, talde txikietan sortzen ari den dinamika hori zabaltzeko eginkizuna daukagula uste dugu Topagunean. Mintzalagunen eginahala gizarteratu behar dugu. Kalera atera ginen, ziren, baina orain administraziora, dendetara, bulegoetara zein merkatura atera behar dugu. Astero ordubetez egiten duten ahalegina egunerokora zabaldu behar dugu, hizkuntza ohituretan eragin, eta euskararentzako eta euskaldunontzako gune berriak irabazi behar ditugu. Algortako tabernan zein Bergarako parkean biltzen diren boskote horien lana islatu dezagun.

Ezin dugu ardura guztia euskaltegien esku utzi, hauek lana ederto eginda ere. Herritarra komunitatean parte hartzeko gogoz dago, eta euskaldun guztion funtzioa da kide berriei ateak zabaltzea. Mintzalagunen taldeek ez dute zentzurik, talde horietatik kanpo euskararen erabilera bultzatzen ez badugu. Irabazi ditzagun gune berriak, eta lagundu diezaiegun gurekin batera aritu nahi duten horiei, euskaldunon komunitateak kide berriak izan ditzan.

Arrate Illaro Etxebarria

Euskaltzaleen Topagunea

Mintzalagun, honezkero joan dira Etxalarren gainontzeko kideekin egoteko antolatu ditugun bi asteburuak, baina zita berria daukagu jadanik! Aurreratu genizuen bezala, Euskal Herriko Mintza Eguna Elgoibarren izango da, ekainaren 1ean. Izan ere, Elgoibarko Izarra Kultur Elkarteak 50 urte bete ditu aurten, eta urteurrena ospatzeko Euskal Herri osoko mintzalagunak batu nahi dituzte herrian. Bertako berbalagunek eta elkarteko kideek hilabeteak daramatzate jaia prestatzen, eta ziur bikaina izango dela!

Aurten ere egun osoko festa izango dugu, eta sorpresak azken unerako utziko ditugun arren, hemen daukazue…

EGITARAUA

11.00 Ongi etorria eta hamaiketakoa Maalako Plazan

12.00 Ibilaldi gidatua

13:30 Mintza Kalejira

14:30 Bazkaria Maalako Plazan

16.30 Sari banaketa

17:00 Euskal Erromeria MP5 taldearekin

… eta sorpresa gehiago!

Bai, horrela ikusita betiko egitaraua ematen du, baina Elgoibarrek eskura jartzen dizkigun baliabideak izango ditugu lagun! Bertsolariak, dantzariak, dultzaineroak…  Herri berria, dantzan jarriko gaituen erromeria berria (ez dakitenek ere ikasteko aukera izango dute), eta baita saritu berriak ere!

Bazkarirako txartelak maiatzaren 2tik 24ra eskuratu daitezke, herriko dinamizatzailearen bidez. 20€ dira, kafea eta kopa barne (eta goizeko hamaiketakoa, noski!). Gogoratu zeliako eta barazkijaleek aldez aurretik eskatu behat duzuela menu berezia. Ez utzi azken unerako!

Giroa berotzen hasteko, iazko argazkiak ikusi nahi? Egin klik hemen!  Euskal Herriko herri desberdinetako mintzalagunak elkartuko gara Elgoibarren, eta jai giro ezin hobea izango dugu!

Ireki bihotza… Elgoibarko mintzalagunentzako!

Ibilaldiak egin dituzte, sukaldaritza tailerrak, masajeak, herriko etxeak ezagutu, lagun berriak ezagutu, euskaraz aritu dira… Azken bi asteburuetan Etxalarren batu diren 50 lagunek “oso esperientzia positiboa” izan dute. Mokorreko Bordako lagunekin batera, Etxalarko txokoak gozatu dituzte.

Apirilaren 12tik 14ra batu zen lehen taldea. 24 mintzalagun, elkarrekin esperientzia berri bat izateko gogoz. Hurrengo asteburuan, beste 26 izan ziren: Gasteiz, Orereta, Deustu, Iruñerria, Bergara, Arrasate, Tolosa, Aretxabaleta, Santutxu… Euskal Herri osoko mintzalagunak elkartu ziren Etxalarko lagunekin.

Topaketen helburua, herri desberdinetako mintzalagunak harremanetan jartzea izan da, gainontzekoen errealitatea ezagutu eta lagun berriak egiteaz gain, euskaraz gozatzeko aukera izanik.

Etxalarko Mokorreko Borda baserri-barnetegiko arduradunak, Jone Arrospidek, esan digunez, joandako mintzalagun guztiak oso inplikatuta egon dira ekintza guztietan, zorionak osatu dituzuen taldeengatik!

Joateko aukerarik izan ez dugunok inbidiaz ikusi ditugu zuetako batzuek bidalitako argazkiak, eskerrik asko! Gainontzekoek ikusi nahi badituzue, egin klik hemen!

Eta eskerrik asko, nola ez, Etxalarko barnetegiko arduradun eta kide guztiei, mintzalagunei horrelako esperientzia aberasgarri bat eskaintzeagatik. Bihotza soilik ez, zuen etxeko ateak ireki dizkiezue mintzalagunei!

Gogoratu, hurrengo zita Mintza Egunean izango dugu, ekainaren 1ean, Elgoibarren. Bertan elkartuko gara, ezta?

Duela aste batzuk mintzalagunak Etxalarrera joateko eskaintza zabaldu genuen… eta aterpetxea bete dugu! Apirilaren 13tik 14ra Euskal Herri osoko 28 mintzalagun bilduko dira, familia giroan, ederto pasa eta Etxalarko altxorrak ezagutzeko.

Lagun asko joateko gogoz geratu dira, eta horregatik, eskaintza zabaldu dugu. APIRILAREN 20tik 21era ere Etxalarrera joateko aukera egongo da, eman izena!

Nor joan daiteke Etxalarrera?

Asteburu berezi bat izan nahi duten mintzalagun guztiak, euskaraz gozatu nahi dutenak, beste herri batzuetako berbalagunak ezagutu nahi dituztenak, Etxalarreko txokoak ikusi nahi dituztenak…

Ez ahaztu, Mokorreko-Borda baserrian zain ditugu, eta egitarau ezin hobea antolatu dute!

EGITARAUA

Apirilak 20, larunbata

Ongi etorria eta aurkezpen jolasak

Tailerra: sukaldaritza energetikoa

Bazkaria

Ingurua ezagutzeko ibilaldia

Masaje tailerra

Afaria

Euskal kantu gaua

Apirilak 21, igandea

Etxalar eta herriko etxeen historia, herritarrekin

Kantu bira herrian

Bazkaria

Larunbat goizean heldu eta igande bazkalostera arte, otorduak, lotarako lekua, tailerrak eta ibilaldiak, 55€.

Izena ematea martxoaren 27a baino lehen (herriko dinamizatzaileari galdetu edo arrate@topagunea.org helbidera idatzi). Arin ibili, 28 lagunentzako lekua baino ez dago!

*Oharra: prezioan ez dira izarak sartzen. Lo sakua eraman, edo 5 euro ordainduta bertan alokatu daitezke.

Etxea ezagutu nahi? http://etxalarkobarnetegia.blogspot.com

Asteburu berezi bat izan nahi duten mintzalagun guztientzako, euskaraz gozatu nahi dutenentzako, beste herri batzuetako berbalagunak ezagutu nahi dituztenentzako, Etxalarreko txokoak ikusi nahi dituztenentzako…

Euskal Herri osoko mintzalagunentzako asteburuko plana antolatu dugu, Etxalarren, apirilaren 13tik 14ra. Mokorreko-Borda baserrian zain ditugu, eta egitarau ezin hobea antolatu dute!

EGITARAUA

Apirilak 13, larunbata

Ongi etorria eta aurkezpen jolasak

Tailerra: sukaldaritza energetikoa

Bazkaria

Ingurua ezagutzeko ibilaldia

Masaje tailerra

Afaria

Euskal kantu gaua

Apirilak 14, igandea

Etxalar eta herriko etxeen historia, herritarrekin

Kantu bira herrian

Bazkaria

Etxera!

Larunbat goizean heldu eta igande bazkalostera arte, otorduak, lotarako lekua, tailerrak eta ibilaldiak, 55€.

Izena ematea martxoaren 27a baino lehen (herriko dinamizatzaileari galdetu edo arrate@topagunea.org helbidera idatzi). Arin ibili, 28 lagunentzako lekua baino ez dago!

*Oharra: prezioan ez dira izarak sartzen. Lo sakua eraman, edo 5 euro ordainduta bertan alokatu daitezke.
Etxea ezagutu nahi? http://etxalarkobarnetegia.blogspot.com